इलाम — विद्यार्थीमा स्वास्थ्य सचेतना बढाउनुका साथै मानवीय सेवा र स्वयंसेवाको भावना विकास गर्ने उद्देश्यले इलाम नगरपालिका–७ स्थित आदर्श माध्यमिक विद्यालयमा विभिन्न स्वास्थ्यसम्बन्धी कार्यक्रम सञ्चालन गरिएको छ।
६४औँ रेडक्रस दिवसको अवसरमा विद्यालयको युवा रेडक्रस सर्कलको आयोजनामा करिब ३०० विद्यार्थीको रक्त समूह पहिचान तथा निःशुल्क आँखा परीक्षण गरिएको हो। विद्यार्थीलाई आफ्नै स्वास्थ्य अवस्थाबारे आधारभूत जानकारी गराउने, आँखासम्बन्धी समस्या भए समयमै पहिचान गर्ने तथा स्वास्थ्यप्रति जिम्मेवार बन्न प्रेरित गर्ने उद्देश्यले कार्यक्रम गरिएको आयोजकले जनाएको छ।
विद्यालय परिसरमा सञ्चालन भएको स्वास्थ्य कार्यक्रममा विद्यार्थीहरूको उल्लेख्य सहभागिता रहेको थियो। रक्त समूहको जानकारी सामान्य स्वास्थ्य विवरणजस्तो देखिए पनि आकस्मिक अवस्थामा रगत आवश्यक पर्दा निकै उपयोगी हुने भएकाले विद्यार्थीहरूको रक्त समूह पहिचान गरिएको आयोजकको भनाइ छ।
त्यस्तै, आँखा परीक्षणका क्रममा दृष्टिसम्बन्धी समस्या हुन सक्ने विद्यार्थीहरूको प्रारम्भिक पहिचान गर्ने प्रयास गरिएको थियो। आवश्यक देखिएका विद्यार्थीलाई स्वास्थ्यसम्बन्धी परामर्शसमेत उपलब्ध गराइएको जनाइएको छ। विद्यालय तहदेखि नै स्वास्थ्यसम्बन्धी आधारभूत जानकारी र सचेतना अभिवृद्धि गर्न यस्ता कार्यक्रम प्रभावकारी हुने अपेक्षा गरिएको छ।
कार्यक्रम युवा रेडक्रस सर्कल आदर्शका अध्यक्ष मिक्साम लावतीको अध्यक्षतामा सम्पन्न भएको थियो। इलाम नगरपालिका–७ का वडाध्यक्ष नरेश श्रेष्ठले कार्यक्रमको उद्घाटन गर्नुभएको थियो।
कार्यक्रममा विद्यालय व्यवस्थापन समितिका अध्यक्ष अर्जुनकुमार बस्नेत, नेपाल रेडक्रस सोसाइटी इलाम जिल्ला शाखाका मन्त्री रविन्द्र श्रेष्ठ, उपमन्त्री हरि फुयाल, नेपाल नेत्रज्योति संघ इलामका प्रतिनिधि, द आर्ट अफ लिभिङ इलामका प्रतिनिधि, विद्यालयका शिक्षक–शिक्षिका तथा विद्यार्थीहरूको सहभागिता रहेको थियो।
कार्यक्रममा बोल्दै वडाध्यक्ष श्रेष्ठले विद्यार्थीको शिक्षा केवल पाठ्यपुस्तकमा सीमित हुन नहुने बताउनुभयो। उहाँले स्वास्थ्य, मानवीय भावना, स्वयंसेवा तथा सामाजिक जिम्मेवारीसँग विद्यार्थीलाई जोड्न सके भविष्यमा समाजप्रति उत्तरदायी नागरिक निर्माण गर्न सहयोग पुग्ने धारणा राख्नुभयो।
कार्यक्रमका संयोजक पंकज भट्टराईका अनुसार विद्यार्थीहरूको रक्त समूह पहिचानसँगै आँखा परीक्षण र आवश्यक स्वास्थ्य परामर्श प्रदान गरिएको थियो। विद्यालयमा अध्ययनरत विद्यार्थीलाई आफ्नो स्वास्थ्य अवस्थाबारे आधारभूत जानकारी दिलाउनु कार्यक्रमको प्रमुख उद्देश्य रहेको उहाँले बताउनुभयो।
विद्यालयका प्रधानाध्यापक कुमार पौडेलले विद्यार्थीको शैक्षिक प्रगतिसँगै स्वास्थ्य र व्यक्तित्व विकासलाई पनि विद्यालयले प्राथमिकतामा राखेको बताउनुभयो। स्वस्थ शरीर र सकारात्मक सोच विद्यार्थीको समग्र विकासका लागि आवश्यक हुने भएकाले विद्यालयमा समय–समयमा स्वास्थ्यसम्बन्धी गतिविधि सञ्चालन गर्दै आएको उहाँको भनाइ थियो।
नेपाल रेडक्रस सोसाइटी चियाबारी उपशाखाका सचिव रामकुमार शाहले विद्यार्थीमा सम्भावित स्वास्थ्य समस्या पहिचान गरी आवश्यक परामर्श तथा सेवासम्म पहुँच पुर्याउने उद्देश्यले कार्यक्रम सञ्चालन गरिएको बताउनुभयो। उहाँका अनुसार विद्यालयमा गठन भएका युवा रेडक्रस सर्कलले विद्यार्थीलाई सामाजिक सेवा र मानवीय गतिविधिमा सहभागी गराउन महत्वपूर्ण भूमिका खेल्दै आएको छ।
स्वास्थ्य कार्यक्रम सञ्चालनका लागि आदर्श बहुउद्देश्यीय सहकारी संस्था लिमिटेडद्वारा सञ्चालित आदर्श फार्मेसी तथा पोलिक्लिनिक, नेपाल नेत्रज्योति संघ इलाम, जिल्ला अस्पताल इलाम र नेपाल रेडक्रस सोसाइटी इलाम शाखाले प्राविधिक तथा अन्य आवश्यक सहयोग गरेका थिए।
कार्यक्रममा विभिन्न संस्था तथा सामाजिक क्षेत्रका व्यक्तिहरूको सहयोगसमेत प्राप्त भएको आयोजकले जनाएको छ। यसै क्रममा लप्साङ शेर्पा र रुबिना शेर्पाले आफ्ना छोराको स्मृतिमा स्वास्थ्य शिविरका लागि आवश्यक औषधि उपलब्ध गराएका थिए। व्यक्तिगत स्मृतिलाई सामाजिक सेवासँग जोड्दै गरिएको उक्त सहयोगलाई आयोजकले प्रशंसनीय कार्यका रूपमा लिएको छ।
रेडक्रस दिवसलाई औपचारिक कार्यक्रममै सीमित नराखी मानवीय सेवा, सहयोग, स्वयंसेवा र सामाजिक उत्तरदायित्वका गतिविधिसँग जोड्ने उद्देश्यले विद्यालयमा स्वास्थ्य कार्यक्रम आयोजना गरिएको आयोजकको भनाइ छ।
युवा रेडक्रस सर्कलमार्फत विद्यार्थीलाई स्वास्थ्य सचेतना, सामाजिक सेवा, विपद् व्यवस्थापन तथा मानवीय सहयोगका गतिविधिमा निरन्तर सहभागी गराउन सके विद्यालयले शैक्षिक ज्ञानसँगै सेवाभाव र सामाजिक जिम्मेवारी बोकेका विद्यार्थी निर्माणमा समेत योगदान पुर्याउने विश्वास गरिएको छ।
आयोजक सदस्यमध्ये झलक भट्टराई पनि कार्यक्रममा सक्रिय रूपमा सहभागी रहनुभएको थियो।
