काठमाडौँ, साउन ४ — नेपालमा गत वैशाखदेखि हालसम्म प्राकृतिक तथा अन्य विपद्का घटनाले ठूलो जनधनको क्षति पुर्याएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्याङ्कअनुसार चार महिनाको अवधिमा देशभर ३ हजार ४३५ वटा विपद्का घटना अभिलेख भएका छन्। ती घटनामा १६६ जनाको मृत्यु भएको छ भने ९८८ जना घाइते भएका छन्।
प्राधिकरणका अनुसार विपद्का कारण ४ हजार ५३१ घरपरिवार प्रत्यक्ष रूपमा प्रभावित भएका छन्। आगलागी, पहिरो, बाढी, हुरीबतास, चट्याङ, सर्पदंशलगायतका घटनाले विभिन्न जिल्लामा जनजीवन प्रभावित बनाएको छ।
तथ्याङ्कअनुसार सबैभन्दा धेरै ९१४ वटा आगलागीका घटना भएका छन्। त्यसपछि सर्पदंशका ५३५, पहिरोका ४९५, हुरीबतासका ४७८, चट्याङका २२९, डढेलोका १९१, जनावरको आक्रमणका १९०, बाढीका १७१ तथा भारी वर्षाका १६६ घटना अभिलेख भएका छन्। यसबाहेक लेक लाग्ने ५५, असिनापानीका चार, डुङ्गा पल्टिएको एक, हिमपहिरोका दुई र अन्य चार वटा घटना पनि दर्ता भएका छन्।
प्राधिकरणले सार्वजनिक गरेको पछिल्लो विवरणअनुसार साउन २ गते बिहानदेखि साउन ३ गते बिहानसम्म मात्रै देशभर ५८ वटा विपद्का घटना भएका छन्। ती घटनामा तीन जनाको मृत्यु भएको छ भने १३ जना घाइते भएका छन्। यो अवधिमा ४५ जिल्ला कुनै न कुनै प्रकारको विपद्बाट प्रभावित भएका छन्।
मनसुन सक्रिय भइरहेका कारण आगामी दिनमा पनि बाढी, पहिरो, डुबान, चट्याङ तथा अन्य विपद्को जोखिम कायम रहने भएकाले सम्बन्धित निकायले सतर्कता अपनाउन र नागरिकलाई आवश्यक सावधानी अपनाउन आग्रह गरेका छन्।
