काठमाडौ । काठमाडौँको तारकेश्वर नगरपालिका–६ लोलाङ पैँयुटारमा घरायसी विवादका क्रममा एक महिलाको मृत्यु भएको छ। घटनामा संलग्न रहेको आरोपमा प्रहरीले उनका श्रीमान्लाई नियन्त्रणमा लिएर अनुसन्धान अघि बढाएको छ।
प्रहरीका अनुसार ४२ वर्षीय कुमार थापामाथि आफ्नी ४२ वर्षीया श्रीमती ईश्वरी भुजेलमाथि फलामको रड प्रहार गरेको आरोप लागेको छ। घटनापछि गम्भीर घाइते भएकी भुजेललाई तत्काल उपचारका लागि त्रिवि शिक्षण अस्पताल, महाराजगञ्ज लगिएको थियो। उपचारकै क्रममा उनको मृत्यु भएको प्रहरीले जनाएको छ।
प्राप्त जानकारीअनुसार शुक्रबार राति करिब १०:१० बजेतिर भएको उक्त घटनापछि प्रहरीले थापालाई पक्राउ गरी प्रहरी वृत्त बालाजुको हिरासतमा राखेको छ। घटनाको कारण र परिस्थितिबारे विस्तृत अनुसन्धान भइरहेको प्रहरी स्रोतले जनाएको छ।
स्थानीय तहमा भएको यस घटनाले घरेलु विवादले कहिलेकाहीँ गम्भीर र दुःखद रूप लिन सक्ने विषयलाई फेरि एकपटक उजागर गरेको छ। प्रहरीले घटनासम्बन्धी सबै पक्षको अनुसन्धानपछि थप विवरण सार्वजनिक गरिने बताएको छ।
