विनोद मण्डल
सिराहा । सिराहाको लहान नगरपालिका वडा नंवर २४ का जनताले वडा अध्यक्ष कमल देव यादवको कार्यकक्षमा ताल्चा लगाएका छन् । लहान नगरपालिकाको उत्तरी भागमा रहेको ग्रामीण बस्ती गोविन्दपुरको ग्रामिणमा रहेको वडा कार्यालयको अध्यक्ष बस्ने कोठामा स्थानिय आक्रोशित जनताले आज दिनको १२.३० बजेको समयमा ताल्चा लगाएका छन् भने सचिव लगायतका जनतासँग प्रत्यक्ष सरोकार राख्ने कार्यालयका अन्य प्रशासनिक कार्य भने खुल्ला रहने स्थानिय शितल शाहले बताउनु भएको छ ।
स्थानिय सरकार आएको करिब ४ बर्ष बितिसक्दा पनि बाटोघाटोमा विकास नगरेको, बजेटको हिसाब नदिएको, वडा भेलामा बस्ने भन्दापनि पटक पटक समय लिएर उपस्थित नभएको, बजेटको नाममा कार्यकर्ता पालन पोषण गरेको, बाटो विकासको लागि पुरानो टोलमा असोज २ गतेदेखि जारी ढाट आन्दोलनको सम्बोधन नगरेको र फोहोरको उचित व्यवस्थापन नगरेको भन्दै आज एक कार्यक्रमका बीच कार्यालय परिसर पुगेका स्थानिय आक्रोशित जनताले आफ्ना माग पूरा नभएसम्मको लागि वडा कार्यालयको अध्यक्षको कार्यालयमा ताल्चा लगाएका हुन् ।
स्थानिय जनताको विकास गर्ने जवाफदेही पाएका अध्यक्ष यादव प्रति स्थानिय जनता विगत चार वर्षदेखि पीडित रहेको स्थानियको गुनासो रहीआएको छ । यता नगर प्रमुख मेयर मुनि शाह भने दर्शक बनेर स्थानियको समस्यालाई हेरिरहेको यस अवस्थामा सम्बन्धित निकायको ध्यान आकर्षण गर्नु पर्ने देखिन्छ ।
