सुनसरी । धरानमा लागूऔषधसम्बन्धी समस्या प्रहरीका लागि प्रमुख चुनौतीका रूपमा देखिएको छ। इलाका प्रहरी कार्यालय धरानमा पछिल्ला तीन आर्थिक वर्षको उपलब्ध अवधिमा लागूऔषधसम्बन्धी ४०६ मुद्दा दर्ता भएका छन्।
इलाका प्रहरी कार्यालयको तथ्याङ्कअनुसार आर्थिक वर्ष २०८१/८२ देखि चालु आर्थिक वर्ष २०८३/८४ को असोजसम्म विभिन्न प्रकृतिका एक हजार १७२ मुद्दा दर्ता भएका छन्। तीमध्ये लागूऔषधसँग सम्बन्धित मुद्दाको संख्या सबैभन्दा धेरै रहेको जनाइएको छ।
प्रहरीका अनुसार आर्थिक वर्ष २०८१/८२ मा विभिन्न कसुरमा ५१७ मुद्दा दर्ता भएका थिए। उक्त वर्ष ५८१ पुरुष र ६८ महिला पक्राउ परेका थिए। त्यसैगरी, आर्थिक वर्ष २०८२/८३ मा ४९४ मुद्दा दर्ता हुँदा ५०९ पुरुष र ४७ महिला पक्राउ परेका थिए।
चालु आर्थिक वर्ष २०८३/८४ को साउनदेखि असोजसम्म १६१ मुद्दा दर्ता भएको इलाका प्रहरी कार्यालयले जनाएको छ। यस अवधिमा १०३ पुरुष र आठ महिला गरी १११ जना पक्राउ परेका थिए।
लागूऔषधसम्बन्धी मुद्दाबाहेक अभद्र व्यवहार, बैंकिङ कसुर, कर्तव्य ज्यान, चोरी, बहुविवाह, भवितव्य ज्यान तथा जबर्जस्ती करणीका घटनामा पनि प्रहरीमा मुद्दा दर्ता भएका छन्।
इलाका प्रहरी कार्यालय धरानका प्रमुख भीषणबाबु राईका अनुसार लागूऔषधको प्रयोग तथा कारोबारमा ज्याला मजदुरी गर्ने र बेरोजगार युवाको संलग्नता बढी देखिएको छ। प्रहरीका अनुसार १५ देखि ५५ वर्ष उमेर समूहका व्यक्तिहरू यस्ता गतिविधिमा संलग्न भएको पाइएको छ।
लागूऔषध ओसारपसार तथा बिक्री वितरणमा संलग्न व्यक्तिले विभिन्न तरिका अपनाउने गरेको प्रहरीको भनाइ छ। सवारीसाधनमा लुकाएर, गोप्य खण्ड बनाएर तथा शरीरका विभिन्न भागमा लुकाई लागूऔषध ओसारपसार गर्ने गरेको पाइएको प्रमुख राईले जानकारी दिएका छन्।
धरानमा लागूऔषध नियन्त्रणका लागि प्रहरीको निगरानीसँगै परिवार, समुदाय र सम्बन्धित निकायबीच समन्वय आवश्यक देखिन्छ। विशेषगरी युवालाई लागूऔषधको जोखिमबारे सचेत गराउने, रोकथामका कार्यक्रम सञ्चालन गर्ने र शंकास्पद गतिविधिबारे सम्बन्धित निकायलाई जानकारी दिने कार्यले नियन्त्रण प्रयासमा सहयोग पुर्याउन सक्छ।
