बिर्तामोड, ५ कात्तिक। झापाको बिर्तामोड नगरपालिका–२ रामचोकस्थित एक बडी ग्यारेजको क्यान्टिनमा आगलागी हुँदा ६५ वर्षीय एक पुरुषको मृत्यु भएको छ। आगलागीबाट क्यान्टिनका सामग्री जलेर नष्ट हुँदा करिब तीन लाख रुपैयाँ बराबरको क्षति भएको प्रारम्भिक अनुमान गरिएको छ।
प्रहरीका अनुसार २०८३ साल कात्तिक ५ गते बिहान करिब ४ः१० बजे रामचोकस्थित ध्रुव भट्टराईको जग्गामा रहेको टिनको छानो भएको घरमा सञ्चालित बडी ग्यारेजको क्यान्टिनमा आगलागी भएको हो। उक्त ग्यारेज बिर्तामोड नगरपालिका–४ निवासी रवि राजवंशीले सञ्चालन गर्दै आएका थिए।
प्रारम्भिक विवरणअनुसार विद्युत् सर्ट भएर आगलागी भएको आशंका गरिएको छ। आगलागीको खबर पाएपछि प्रहरी, दमकल तथा स्थानीय बासिन्दा घटनास्थलमा पुगेर आगो नियन्त्रणमा लिने प्रयास गरेका थिए। उनीहरूको सहयोगमा बिहान करिब ४ः३० बजे आगो पूर्ण रूपमा नियन्त्रणमा लिइएको प्रहरीले जनाएको छ।
घटनाबारे थप जानकारी संकलन गर्ने क्रममा क्यान्टिनमा काम गर्दै आएका गौरीगञ्ज गाउँपालिका–२ निवासी ६५ वर्षीय रुद्रबहादुर तामाङको आगलागीमा परेर मृत्यु भएको खुलेको प्रहरीले जनाएको छ।
आगलागीबाट क्यान्टिनभित्र रहेका भाँडाकुँडा, लत्ताकपडा, तीन थान खसीबाख्रा तथा नगद एक लाख रुपैयाँ जलेर नष्ट भएका छन्। यी सामग्रीमा भएको क्षतिसहित क्यान्टिनतर्फ करिब तीन लाख रुपैयाँ बराबरको नोक्सानी भएको प्रारम्भिक आकलन गरिएको छ।
यसैगरी, ग्यारेजसँगै जोडिएको राजेन्द्र अग्रवालले सञ्चालन गर्दै आएको मार्बल तथा टायल्सको गोदाममा पनि आगोको असर परेको थियो। आगो निभाउने क्रममा दमकलको पानीले गोदाममा राखिएका करिब २० देखि २५ बोरा सिमेन्ट भिजेर प्रयोग गर्न नमिल्ने अवस्थामा पुगेको बताइएको छ। यसबाट थप करिब २५ हजार रुपैयाँ बराबरको क्षति भएको अनुमान छ।
घटनाबाट भएको कुल क्षतिको यकिन विवरण संकलन गर्ने काम भइरहेको प्रहरीले जनाएको छ। आगलागीको वास्तविक कारण तथा घटनासँग सम्बन्धित अन्य विषयमा थप अनुसन्धान भइरहेको छ।
स्रोत: जिल्ला प्रहरी कार्यालय झापाअन्तर्गत इलाका प्रहरी कार्यालय अनारमनीबाट प्राप्त विवरण।
