काठमाडौ । चितवनका भीमबहादुर विश्वकर्माको हत्याविरुद्ध काठमाडौंको माइतीघर मण्डलामा विरोध प्रदर्शन गरिएको छ।
जसपा नेपाल शिल्पी विशेष प्रदेश राष्ट्रिय समिति र जनता समाजवादी दलित मुक्ति संगठनले बिहीबार माईतीघर मण्डलामा विरोध र्याली निकालेका हुन् । प्रदर्शनमा सहभागीहरूले सबैखाले विभेदको अन्त्य गर्न र छुवाछुतका कारण हत्या गरिएका विकको न्यायको माग गरेका छन्।
प्रदर्शनमा जनता समाजवादी पार्टीका संघीय परिषद् अध्यक्ष बाबुराम भट्टराईलगायत अन्य नेता कार्यकर्ताको उपस्थिति रहेको थियो। भरतपुर नगरपालिकाका ५८ वर्षीय विकको गत असोज २८ मा मन्दिर प्रवेश गर्न पाउनुपर्ने विषयमा भएको विवादमा स्थानीयको कुटपिटबाट मृत्यु भएको थियो।
जातिय छुवाछुतकै कारण विकले ज्यान गुमाएपछि दोषीलाई कारबाहीको माग गर्दै विरोध प्रदर्शन गरिएको हो।
