पोखरा । आफ्नो सम्पतिबारे आफैं ‘कन्फ्युज’ रहेको बताएका गण्डकी प्रदेशका युवा तथा खेलकुदमन्त्री राजीव गुरुङ (दीपक मनाङे)ले सम्पत्ति विवरण सार्वजनिक गरेका छन् । उनले अर्कैको नाममा जग्गा र आफू ऋणमा रहेको विवरण सार्वजनिक गरेका छन् । अर्कैको नाममा बैनापट्टा गरेको, संयुक्त लगानीमा जग्गा र कृषि फार्म रहेको तथा आफू ऋणमा रहेको मनाङेको सम्पत्ति विवरण सार्वजनिक भएको छ ।
गत जेठ २९ गते नियुक्त भएका मन्त्री मनाङेले असोज १८ गते आफ्नो सम्पत्ति विवरण मुख्यमन्त्री तथा मन्त्रिपरिषद्को कार्यालयमा बुझाएका थिए । मन्त्री नियुक्त भएको ६० दिनभित्र पेश गर्नुपर्ने प्रावधान रहे पनि मनाङेको सम्पत्ति विवरण साढे चार महीनापछि सार्वजनिक भएको हो । मनाङ प्रदेश सभा ‘ख’ बाट निर्वाचित मनाङेले स्थाथी ठेगाना काठमाडौं-२९ उल्लेख गरेका छन् भने हालको ठेगाना पोखरा-१४ काजीपोखरी खुलाएका छन् ।
समयमै सम्पत्ति विवरण सार्वजनिक नगरेका मनाङेले भदौ २७ गते सम्पत्ति जम्मै पहिलेको छोराछोरी, श्रीमतीको नाममा राखिदिइसकेको बताएका थिए । तर, उनको एउटा छोराको नाममा जग्गा देखाए पनि अरु सम्पत्ति भने खुलाएका छैनन् । मनाङेले २०७० सालमा अकुत सम्पत्ति जोडेको आरोपमा सम्पत्ति शुद्धीकरणको मुद्दा खेपेका थिए । २०७४ सालमा उनले विशेष अदालतबाट सफाइ पाएका थिए ।
‘केटाहरू’को नाममा थुप्रै लगानी गरेको बताएका मनाङले सम्पत्ति विवरणमा अर्कैको नामको जग्गामा बैनापट्टा गरेको देखाएका छन् । तर, ती लगानीको स्रोत भने मनाङेले उल्लेख नै गरेका छैनन् । मनाङेले प्रकाश, कृष्ण र श्याम महर्जनको नाममा काठमाडौं-२९ धर्मस्थलीमा क्रमशः कित्ता नम्बर २४, ६७, ७६ को जग्गा रहेको खुलाएका छन् । जग्गा प्रतिआना ९ लाख रुपैयाँमा किनेको उल्लेख गरेका छन् ।
यसैगरी मालती महतारासँगको संयुक्त लगानीमा चन्द्रागिरि-२ मा ३ रोपनी जग्गा रहेको मनाङेले उल्लेख गरेका छन् । पदमपोखरी मकवानपुरमा उक रोपनी ९ आना १० दाम संयुक्त जग्गामध्ये छोराको नाममा १५ आना जग्गा रहेको उनले बताएका छन् । जग्गाको विवरणमा मनाङेले स्पष्ट हुने गरी खुलाएका छैनन् ।
‘मालती महतरासँगको जग्गा संयुक्तमा हो भने मकवानपुरको पदमपोखरीमा छोरा दि्रव्यको नाममा रहेको जग्गा हो,’ मनाङेका स्वकीय सचिव रोनित गुरुङले भने, ‘गण्डकी एग्रोभेट उल्लेख भए पनि त्यो गण्डकी एग्रिकल्चर हो । त्यो पामेभन्दा माथि लौरुकमा छ ।’
मनाङेले बुझाएको सम्पत्ति विवरणमा मकवानपुरमा यत्मेय गुरुङको नाममा जग्गा रहेको उल्लेख भए पनि त्यसबारे आफूले पनि नबुझेको भन्दै मकवानपुरमा छोराको नाममा रहेको जग्गा भएको रोनितको भनाइ थियो ।
२२ तोला सुन, १० लाख नगद र डेढ करोड ऋण
२०५४ सालमा १५ तोला र २०७० मा ७ तोला तत्कालीन मूल्यअनुसार खरिद गरी आफूसँग २२ तोला सुन रहेको मनाङेले उल्लेख गरेका छन् । २०५४ मा वैदेशिक रोजगारी र २०७० मा व्यापार व्यवसायबाट सुन प्राप्ति गरेको मनाङेले स्रोत उल्लेख गरेका छन् । मनाङेले एभरेष्ट बैंक पोखरामा १० लाख ४९ हजार ५ सय ३६ रुपैयाँ मौज्दात देखाएका छन् । उक्त रकम सांसद र मन्त्री हुँदा प्राप्त भएको उनले उल्लेख गरेका छन् ।
व्यवसायबाट २०६८ सालमा खरिद गरेको ४५ तोला चाँदी मनाङेसँग छ । पैतृक सम्पतिका रुपमा मुगाको माला ८३ तोला रहेको उनले उल्लेख गरेका छन् । मनाङेले ६ करोड १० लाख रुपैयाँ ऋण लिएर ४ करोड ७० लाख रुपैयाँ तिरेको सम्पति विवरणमा उल्लेख गरेका छन् । २०७३ सालमा कर्म गुरुङसँग ४० लाख रुपैयाँ ऋण लिएको मनाङेले बताएका छन् । यस्तै रमेश रानासँग २०७७ सालमा ४० लाख रुपैयाँ, मनाङ फलफूल सप्लायर्ससँग २०७३ सालमा ६० लाख ऋण लिएको मनाङेले सम्पति विवरणमा देखाएका छन् ।
टीका भण्डारीसँग दुई करोड ३५ लाख रुपैयाँ ऋण लिएर २०७१ सालमा तिरेको र २०७२ सालमा टासी गुरुङसँग २ करोड ३५ लाख रुपैयाँ ऋण लिएर चुक्ता गरेको विवरण मनाङेले उल्लेख गरेका छन् । विवरणअनुसार मनाङे १ करोड ४० लाख रुपैयाँ ऋणमा देखिएका छन् । संघर्ष गाईभैंसी प्रालिमा भैंसी २० वटा र गाई ५ वटा रहेको मनाङेले बताएका छन् । यसको ठाउँ उल्लेख नभए पनि यो पोखरा-१४ काजीपोखरीमा रहेको उनका स्वकीय सचिव रोनितले बताए । त्यसमा आˆनो ४० प्रतिशत शेयर रहेको मनाङेले बताएका छन् ।
गण्डकीका मुख्यमन्त्री कृष्णचन्द्र नेपालीसहित ९ जना मन्त्रीको सम्पत्ति विवरण भदौ ९ गते सार्वजनिक भएको थियो । त्यतिबेला अवधि पुगिसकेको भए पनि मनाङेले सम्पति विवरण बुझाएका थिएनन् भने भूमि व्यवस्था कृषि तथा सहकारी मन्त्री चन्द्रबहादुर बुढाले कोरोना लागेका कारण सो बेला बुझाएका थिएनन् । अहिले बुढाले पनि सम्पति विवरण बुझाइसकेका छन् ।
मनाङबाट स्वतन्त्र सांसद बनेका मनाङे पृथ्वीसुब्बा गुरुङ नेतृत्वको सरकारमा २ पटकसम्म युवा तथा खेलकुद मन्त्री बनेका थिए । पृथ्वीसुब्बाको सरकार ढल्ने निश्चित भएपछि मनाङेले कित्ता परिवर्तन गर्दै नेपाली कांग्रेस, नेकपा माओवादी केन्द्र, राष्ट्रिय जनमोर्चा र जनता समाजवादीको गठबन्धनलाई काँध थापेपछि कांग्रेस संसदीय दलका नेता कृष्णचन्द्र नेपालीको नेतृत्वमा नयाँ सरकार गठन भएको थियो ।
