काठमाडौ, पुस २२ । सरकारले राष्ट्रिय अनुसन्धान विभागको अतिरिक्त मुख्य अनुसन्धान निर्देशक यदुलाल खरेललाई मुख्य अनुसन्धान निर्देशक पदमा बढुवा गरेको छ । बुधवार बसेको मन्त्रिपरिषद्को बैठकले खरेललाई पुस २३ गतेबाट लागू हुनेगरी मुख्य अनुसन्धान निर्देशक पदमा बढुवा गरेको हो ।
यस्तै, सरकारले उखुको न्यूनतम खरिद मूल्य पनि तोकेको छ । प्रवक्ता कार्कीले प्रतिक्विन्टल उखुको मूल्य ५२० रुपैयाँ निर्धारण गर्नेलगायत निर्णय भएको बताए ।
यी हुन् मन्त्रिपरिषद् बैठकका १४ निर्णयहरु :
१. राष्ट्रिय अनुसन्धान विभागका अतिरिक्त मुख्य अनुसन्धान निर्देशक यदुलाल खरेललाई पुस २३ गतेबाट लागु हुने गरी मुख्य अनुसन्धान पदमा बढुवा गर्ने ।
२. आर्थिक वृद्धि तथा उत्पादनशिलताका लागि जापान सरकारबाट प्राप्त हुने जापानी येन १० बिलियन (करिब १० अर्ब ३९ करोड रुपैयाँ) नीतिगत ऋण सहायता स्वीकार गर्ने ।
३. आर्थिक वर्ष २०७८/७९ का लागि उखुको न्यूनतम खरिद मूल्य प्रतिक्विन्टल ५२० रुपैयाँ निर्धारण गर्ने ।
४. नेपाल विद्युत् प्राधिकरणका विभिन्न वितरण केन्द्र र प्रसारणलाइन आयोजनाका लागि जग्गा प्राप्ति गर्न प्रारम्भिक अधिकार चलाउने अधिकारी तोक्ने ।
५. गृह मन्त्रालय लागुऔषध नियन्त्रण शाखाका शाखा प्रमुख र सबै जिल्ला प्रशासनका शाखा प्रमुख जिल्ला अधिकारीहरूलाई लागुऔषध नियन्त्रण अधिकारी तोक्ने ।
६. एसिड आक्रमणबाट पीडित मुस्कान खातुनलाई तीन लाख रुपैयाँ सहयोग रकम उपलब्ध गराउने ।
७. प्रहरी नवौँ संशोधन नियमवाली–२०७८ स्वीकृत गर्ने ।
८. निजगढको कोहल्वी ३३ किमि सबस्टेसन निर्माणका लागि दुई बिघा जग्गा नेपाल विद्युत् प्राधिकरणलाई लिजमा उपलब्ध गराउन स्वीकृति दिने ।
९. दार्चुला जिल्लामा महाकाली नदीमाथि नेपाल–भारत जोड्ने मोटरेवल पुलको निर्माण गर्न दुईपक्षीय सम्झौतामा हस्ताक्षर गर्न स्वीकृति दिने ।
१०. राष्ट्रिय युवा परिषद्को उपाध्यक्ष पदमा सुरेन्द्र बस्नेत, दमक–१, झापालाई नियुक्त गर्ने ।
११. वन क्षेत्रमा कार्बन सञ्चितिको पहिचानसम्बन्धी अनुसन्धानका लागि रुख कटान गर्दा राष्ट्रिय प्राथामिकता प्राप्त र ठूला पूर्वाधार आयोजनाको क्षेत्राधिकारभित्र पर्ने रुख कटानलाई पहिलो प्राथामिकता दिने गरी आवश्यक रुखहरू कटानमुछान गर्न र नमुनाहरू प्रयोगशालासम्म ल्याउन स्वीकृति प्रदान गर्ने ।
१२. नेपाल राजपत्रको नियमित अंक हप्ताको दुईपटक सोमबार र बिहीबार प्रकाशन गर्न स्वीकृति दिने ।
१३. गोरखापत्र संस्थानलाई गोदाम भवन निर्माण गर्नका लागि जग्गा प्राप्त गर्न स्वीकृति दिने ।
१४. राजपत्रांकित प्रथम श्रेणीका सहसचिव कृष्णबहादुर राउतलाई विशिष्ट श्रेणीको सचिव पदमा बढुवा गर्ने ।
