इलाम, जेठ १७ — नेकपा (एमाले) फाकफोकथुम गाउँपालिका कमिटीले इलामको फाकफोकथुम गाउँपालिका–३ आमचोक निवासी रामकुमार थेगिमको शंकास्पद मृत्यु घटनाप्रति गम्भीर ध्यानाकर्षण भएको जनाएको छ।
कमिटीद्वारा जारी प्रेस विज्ञप्तिअनुसार थेगिम उपचारका लागि २०८३ जेठ १५ गते झापा पुगेका थिए। सोही दिन राति ८ बजेदेखि उनी सम्पर्कविहीन भएका थिए। परिवारजनले रातभर खोजी गर्दा पनि फेला नपरेपछि जेठ १६ गते अनारमनी प्रहरी चौकीमा खोजीका लागि निवेदन दिएका थिए।
विज्ञप्तिमा उल्लेख भएअनुसार सोही दिन बेलुका महानन्द चोक क्षेत्रमा दुवै हात बाँधिएको तथा शरीरभरि रगत लागेको अवस्थामा स्थानीयले थेगिमलाई फेला पारी प्रहरीलाई खबर गरेका थिए। तर प्रहरी घटनास्थलमा पुगेर उनीसँग कुराकानी गरेपछि परिवारलाई जानकारी नगराई त्यहीँ छाडेर गएको आरोप विज्ञप्तिमा गरिएको छ।
केही घण्टापछि थेगिमलाई झन् गम्भीर अवस्थामा भद्रपुर रोड क्षेत्रमा फेला पारिएको र स्थानीयको सूचनापछि प्रहरीले उपचारका लागि लैजाने क्रममा बाटोमै उनको मृत्यु भएको जनाइएको छ।
घटनाप्रति दुःख व्यक्त गर्दै एमाले फाकफोकथुम गाउँपालिका कमिटीले दिवंगत थेगिमप्रति श्रद्धाञ्जली अर्पण तथा शोकसन्तप्त परिवारजनप्रति समवेदना व्यक्त गरेको छ।
साथै परिवारजन र सञ्चारमाध्यममा सार्वजनिक विवरणका आधारमा खोजी, उद्धार तथा आवश्यक समन्वयमा अपेक्षित सक्रियता नदेखिएको विषय गम्भीर रहेको उल्लेख गर्दै लापरबाही वा गैरजिम्मेवारी पुष्टि भए सम्बन्धित व्यक्तिमाथि कडा कारबाही गर्न माग गरेको छ।
कमिटीले घटनाको निष्पक्ष, स्वतन्त्र र विश्वसनीय छानबिन, सत्यतथ्य सार्वजनिक, दोषीमाथि कानुनी कारबाही, पीडित परिवारलाई राहत तथा क्षतिपूर्ति, र भविष्यमा यस्ता घटना दोहोरिन नदिन प्रहरी प्रशासनको जवाफदेहिता र उद्धार क्षमतामा सुधार गर्न सम्बन्धित निकायसँग माग गरेको छ।
एमाले फाकफोकथुम गाउँपालिका कमिटीले पीडित परिवारको न्यायको पक्षमा सधैं दृढतापूर्वक उभिने प्रतिबद्धता समेत व्यक्त गरेको छ।
