आज पाँच प्रदेशमा भारी वर्षाको सम्भावना, सतर्क रहन मौसमविद्को आग्रह

काठमाडौं । देशभर मनसुनी वायु सक्रिय रहेकाले आज पनि विभिन्न स्थानमा वर्षाको क्रम जारी रहने सम्भावना रहेको छ। मौसमको वर्तमान अवस्थाअनुसार पहाडी, हिमाली तथा तराईका विभिन्न भूभागमा हल्कादेखि मध्यम वर्षा हुने अनुमान गरिएको छ भने केही क्षेत्रमा चट्याङ्गसहित भारी वर्षा हुन सक्ने भएकाले आवश्यक सतर्कता अपनाउन मौसमविद्ले सुझाव दिएका छन्।

मौसम पूर्वानुमानअनुसार आज दिउँसो देशका हिमाली, पहाडी र तराई क्षेत्रका केही स्थानमा मेघगर्जन तथा चट्याङ्गसहित वर्षा हुने सम्भावना छ। विशेषगरी कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानमा भारी वर्षा हुन सक्ने भएकाले नदी, खोला तथा पहिरोको जोखिम भएका क्षेत्रमा बसोबास गर्ने नागरिकलाई सावधानी अपनाउन आग्रह गरिएको छ।

यस्तै, साँझदेखि रातिको समयमा पनि मनसुनी प्रणालीको प्रभाव कायम रहने देखिएको छ। राति देशका विभिन्न भूभागमा हल्कादेखि मध्यम वर्षा जारी रहने सम्भावना रहेको छ भने बागमती, गण्डकी र लुम्बिनी प्रदेशका केही स्थानमा पुनः भारी वर्षा हुन सक्ने पूर्वानुमान गरिएको छ।

लगातारको वर्षासँगै पहिरो, डुबान, सडक अवरोध तथा नदी–खोलामा पानीको सतह बढ्न सक्ने जोखिम रहेकाले अत्यावश्यक बाहेकको यात्रा गर्दा विशेष सावधानी अपनाउन सम्बन्धित निकायले आग्रह गरेका छन्। कृषक, यातायात व्यवसायी तथा सर्वसाधारणले मौसमसम्बन्धी अद्यावधिक जानकारी नियमित रूपमा पछ्याउँदै सुरक्षित रहनुपर्ने आवश्यकता औँल्याइएको छ।