झापा । नेपालको पूर्वी प्रवेशद्वारका रूपमा परिचित काँकरभिट्टा स्थल नाकाबाट आर्थिक वर्ष २०८२/८३ अवधिमा नौ हजार चार सय ४७ जना विदेशी पर्यटक नेपाल प्रवेश गरेका छन्। अध्यागमन कार्यालय काँकरभिट्टाको तथ्याङ्कअनुसार यस अवधिमा दैनिक औसत २६ जना विदेशी पर्यटकले यही नाका प्रयोग गरी नेपाल भ्रमण गरेका हुन्।
कार्यालयका निमित्त प्रमुख इन्द्रकुमार राजवंशीका अनुसार सार्वजनिक गरिएको तथ्याङ्कमा भारतीय नागरिकको विवरण समावेश गरिएको छैन। भारत र नेपालबीचको खुला सीमा तथा भारतीय नागरिकलाई भिसा आवश्यक नपर्ने व्यवस्थाका कारण उनीहरूको आगमन अलग रूपमा अभिलेखीकरण गरिएको छैन।
कार्यालयको अभिलेखअनुसार गत आर्थिक वर्षमा कुल ८६ विभिन्न देशका नागरिकले काँकरभिट्टा नाका प्रयोग गरेका थिए। तीमध्ये सबैभन्दा बढी आगमन भुटानका नागरिकको रहेको छ। कुल विदेशी आगन्तुकमध्ये करिब ५३ प्रतिशत अर्थात् चार हजार नौ सय ९४ जना भुटानी नागरिक रहेका छन्। त्यसपछि अमेरिकाबाट दुई हजार एक सय ५२ जना पर्यटक नेपाल प्रवेश गरेका छन्, जुन कुल आगमनको करिब २३ प्रतिशत हो।
तथ्याङ्कले वर्षको पुस र माघ महिनालाई सबैभन्दा व्यस्त पर्यटकीय समयका रूपमा देखाएको छ। पुस महिनामा मात्र एक हजार आठ सय ५० जना विदेशी पर्यटक नेपाल भित्रिएका थिए, जबकि सबैभन्दा कम आगमन भदौ महिनामा भएको थियो। सो अवधिमा दुई सय १६ जना मात्र विदेशी पर्यटकले यो नाका प्रयोग गरेका थिए।
कार्यालयका अनुसार भुटानमा पुस–माघ महिनामा जाडो बिदा पर्ने भएकाले त्यहाँका नागरिक नेपालका विभिन्न धार्मिक तथा पारिवारिक गन्तव्यतर्फ आउने गर्छन्। विशेषगरी झापा तथा आसपासका क्षेत्रमा रहेका आफन्तसँग भेटघाट गर्नुका साथै पूर्वी नेपालको प्रसिद्ध धार्मिक स्थल हलेसी महादेव दर्शनका लागि आउने क्रम बढ्ने भएकाले यही समयमा पर्यटकको चाप उल्लेखनीय हुने गरेको छ।
अध्यागमन कार्यालयले सन् २०२४ को अगस्ट महिनादेखि काँकरभिट्टा नाकाबाट पूर्ण रूपमा अध्यागमन सेवा सञ्चालनमा ल्याएको जनाएको छ। सेवा विस्तार भएको अवधि छोटो भएकाले अझै पनि धेरै विदेशी पर्यटकलाई यस नाकाबाट नेपाल प्रवेश गर्न सकिने जानकारी पर्याप्त रूपमा नपुगेको कार्यालयको भनाइ छ।
पर्यटन प्रवर्द्धन, सहज आवागमन र पूर्वी नाकाको अन्तर्राष्ट्रिय पहिचान विस्तारसँगै आगामी वर्षहरूमा यस नाका प्रयोग गर्ने विदेशी पर्यटकको सङ्ख्या अझ बढ्ने अपेक्षा गरिएको छ।
