काठमाडौं । चलचित्र बिकास बोर्डका अध्यक्ष दयाराम दाहालले दशैँ अगावै देशभरका सम्पूर्ण हल खुल्ने बताएका छन् । उनले दशैँ अगाडि सबै हल खोल्ने र फिल्म रिलिजको लागि तयारीसमेत भएको जानकारी दिए ।
शनिबार नेपाल चलचित्र कलाकार संघको १८ औं साधारण सभालाई सम्बोधन गर्दै बोर्डका अध्यक्ष दाहालले मरणोपरान्त विशिष्ट श्रेणीका कलाकारहरुलाई सरकारले सम्मान गर्ने, विशिष्ट श्रेणीका कलाकारहरुको लागि स्वास्थ्य बीमाको व्यवस्था गर्ने, युवा चलचित्रकर्मीहरुलाई अन्तर्राष्ट्रिय संस्थाहरूसँगको समन्वयमा आयोजित कार्यशालाहरूमा सहभागी गराउने, क्षेत्रीय स्तरमा चलचित्र महोत्सवहरुको नियमित आयोजना गर्ने, बोर्डमा चलचित्र क्षेत्रको चुस्त–दुरुस्त आधिकारिक अभिलेखलाई डिजिटल प्रविधिमा राख्ने लगायतका कामहरुको पहल भईरहेको र यी मध्ये कतिपय काम अन्तिम चरणमा पुगेको जानकारी गराए ।
कार्यक्रममा संघका अध्यक्ष रविन्द्र खड्काले आफ्नो कार्यकालमा भएको कलाकार संघका गतिविधि र कार्य प्रगतिबारे जानकारी दिएका थिए । कार्यक्रममा बरिष्ठ कलाकार वसुन्धरा भुसाल, मदन दास श्रेष्ठ लगायतले कलाकारको देहावसान हुँदा समेत श्रद्धाञ्जली दिन नआउने कलाकर्मीहरुप्रति असन्तुष्टि व्यक्त गरेका थिए ।
संघका उपाध्यक्ष तथा प्रवक्ता मोहन निरौलाले कोभिड १९ का कारण कार्यक्रम निर्धारित मिति भन्दा केही ढिलो हुन गएको जानकारी दिएका थिए ।
