चितवन । चितवन केरा उत्पादक सङ्घले भारतीय केरा आयातमा प्रतिबन्ध लगाउन सरकारसँग माग गरेका छन् । संघले विज्ञप्ति जारी गर्दै भारतीय केराको आयातले नेपाली केरा किसान मारमा परेको जनाएको हो ।
भारतबाट वैध तथा अवैधरूपमा केरा भित्रनु दुःखद कुरा रहेको भन्दै सङ्घले नेपालमै उत्पादित केरालाई प्राथमिकता दिनुपर्ने जनाएको हो । सङ्घका अध्यक्ष माधवप्रसाद घिमिरेद्वारा जारी विज्ञप्तिमा चितवनसहित विभिन्न जिल्लाका किसानले उत्पादन गरेको केरा खेतमै तयारी अवस्थामा रहनु तर विदेशी केराले बजार ओगट्नु दुःखद रहेको जनाइएको छ ।
देशका ठूला बजारमा रहेका थोक केरा व्यापारी, खुद्रा व्यापारी र केही ठूला फलफूल व्यापारी मिलेर बजारलाई नियन्त्रणमा लिन खोजिएको आरोप लगाउँदै विज्ञप्तिमा भनिएको छ, ‘नेपाली किसानको उत्पादनलाई कमभन्दा कम दरमा खरिद गरी मार्ने काम भएको छ, यसलाई रोक्न भारतीय केरा आयातमा तत्काल रोक लगाउन हामी माग गर्दछौं।’
नेपाली केरा किसान भारतीय आयातित केराका कारण विस्थापित हुने स्थितिमा पुग्दासमेत सम्बन्धित निकायले ध्यान नदिएको सङ्घको आरोप छ । नेपालको चेक पोस्टमा भारतीय केराको विषादी कडाइका साथ जाँच गर्न, आयात हुने केराको भन्सारदर वृद्धि गरी अंकुश लगाउनाका साथै नेपाली केराको उत्पादन वृद्धि र बजार व्यवस्थापन गर्न पनि विज्ञप्तिमा अनुरोध गरिएको छ ।
यदि भारतीय केरा आयातमा तत्काल रोक नलगाए सम्पूर्ण केरा किसानहरु आन्दोलन गर्न बाध्य हुने विज्ञप्तिमा उल्लेख गरिएको छ । चितवनमा हाल ७१२ व्यावसायिक किसानले केरा खेती गर्दै आएका छन् । जिल्लामा तीन हजार ५० विघा जमिनमा केराखेती हुँदै आएको छ ।
