जनकपुरधाम, २० असोज । प्रदेश २ का मुख्यमन्त्री लालबाबु राउतले शान्ति सुरक्षाको सवालमा नेपाल प्रहरीको भूमिकालाई अझ प्रभावकारी बनाउन आग्रह गर्नु भएको छ ।
६६ औ प्रहरी दिवसको अवसरमा प्रदेश नम्वर २ प्रदेश प्रहरी कार्यालयले आज (बुधबार) जनकपुरधाममा आयोजना गरेको विशेष कार्यक्रममा मुख्यमन्त्री राउतले आन्तरिक सुरक्षाको जिम्मेवारी प्राप्त नेपाल प्रहरीको भूमिका सराहनीय रहेको उल्लेख गर्दै आफ्नो भूमिकालाई अझ प्रभावकारी बनााउन आग्रह गर्नु भएको छ ।
कर्तव्य पालनाको क्रममा शहादत प्राप्त नेपाल प्रहरीका जवान एवं अधिकृतहरु प्रति श्रद्धासुमन अर्पण गर्नु हुँदै मुख्यमन्त्री राउतले प्रहरी संगठनलाई थप चुस्त दुरुस्त बनाउन प्रदेश सरकार तत्पर रहेको उल्लेख गर्नु भयो ।
प्रदेश सरकार प्रदेशको आन्तरिक शान्ति सुरक्षाको लागी नेपाल प्रहरी संग समन्वय गर्दै नेपाल प्रहरीलाई थप सशक्त बनाउन स्थापना काल देखी नै सहयोग गर्दे आएको समेत उल्लेख गर्नु भयो ।
प्रहरी नायव महानिरीक्षक उमेश रंजितकारको अध्यक्षतामा भएको उक्त कार्यक्रममा आन्तरिक मामिला तथा संचार मंत्री भरत प्रसाद साह, राज्य मन्त्री रुवी कुमारी कर्ण सहितले शुभकामना मन्तव्य राख्नु भएको थियो । कार्यक्रममा शहिद प्रहरी परिवार, सहयोगी संघ संस्था एवं व्यक्तिहरुलाई सम्मान समेत गरिएको थियो ।
