काठमाडौं । सरकारले शिक्षक अस्पताल चितवनको भरतपुरमा बनाउने निर्णय गरेको छ । सोमबार बसेको मन्त्रिपरिषद् बैठकले शिक्षक अस्पताल भरतपुर महानगरपालिकाको – १५ भगवानपुरमा अस्पताल बनाउन उपयुक्त देखेपछि शिक्षा, विज्ञान तथा प्रविधि मन्त्रालयको प्रस्ताव स्वीकृत गरेको हो ।
शिक्षा विज्ञान तथा प्रविधि मन्त्री देवेन्द्र पौडेलले मन्त्रिपरिषद्मा शिक्षक अस्पताल चितवनको भरतपुर, मकवानपुरको चित्लाङ र भक्तपुरको सुर्यविनायकमध्ये एक ठाउँमा बनाउन उपयुक्त हुने प्रस्ताव पेस गरेका थिए । सरकारी शिक्षकका लागि छुट्टै अस्पताल निर्माण गर्ने विषयमा पूर्वसम्भाव्यता अध्ययन एवम् जग्गा पहिचान समितिले अस्पताल बनाउन उपयुक्त हुने तीन ठाउँ रायसहित शिक्षा, विज्ञान तथा प्रविधिमन्त्री पौडेललाई केहि दिन अघि प्रतिवेदन पेश गरेका थिए ।
समितिले पेश गरेको प्रतिवेदनमा भरतपुर महानगरपालिका–१५ भगवानपुर कित्ता नम्बर (५०, ५१, ५२, ६०, ६१, ६२ र ६३) प्रस्तावित शिक्षक अस्पतालका लागि २१ विद्या जग्गा उपुयक्त हुने भन्दै मन्त्रिपरिषद् बैठकले सैद्धान्तिक सहमति दिने निर्णय गरेको शिक्षा विज्ञान तथा प्रविधिमन्त्री पौडेलले जानकारी दिए ।
