काठमाडौं, वैशाख १२ । गोरखा भूकम्पको स्मरण गर्दै आज सातौं भूकम्प दिवस विविध कार्यक्रम आयोजना गरी मनाइँदै छ।
२०७२ वैशाख १२ गते मध्याह्न ११ः५६ बजे गोरखाको बारपाक केन्द्रबिन्दु भएर ७.६ म्याग्निच्युडको भूकम्प गएको थियो। भूकम्पले काठमाडौं, ललितपुर, भक्तपुर, काभ्रेपलाञ्चोक, सिन्धुपाल्चोक, दोलखा, रामेछाप, नुवाकोट, धादिङ, रसुवा, गोरखा, मकवानपुर, सिन्धुली र ओखलढुङ्गा लगायतका जिल्ला बढी प्रभावित भएका थिए।
यी १४ जिल्लालाई सरकारले अतिप्रभावित घोषणा गरेको थियो। भूकम्पले करिब नौ हजार मान्छेको मृत्यु भएको थियो।
अतिप्रभावित १४ र कम प्रभावित १८ जिल्लामा गरी आठ लाखभन्दा बढी निजी आवासमा क्षति पुगेको थियो। भूकम्पले करिब एक हजार ५०० सांस्कृतिक सम्पदामा क्षति भएको थियो।
अतिप्रभावित र प्रभावित जिल्लाका विद्यालय, स्वास्थ्य संस्था, सुरक्षा निकायका भवन, सडक र खानेपानी आयोजनामा भूकम्पले क्षति पुगेको थियो। सात वर्षअघिको भूकम्पले क्षति पुगेका संरचनाको पुनःनिर्माण गर्न २०७२ पुसमा राष्ट्रिय पुनःनिर्माण प्राधिकरणको स्थापना भएको थियो।
१९९० माघ २ गतेको भूकम्पको सम्झनामा सरकारले २०५६ सालदेखि भूकम्प सुरक्षा दिवस मनाउन थालेको थियो। दिवसका माध्यमबाट चेतना जागृत गराई भूकम्बाट सुरक्षित बनाउने सरकारको लक्ष्य छ।
नेपाल भूकम्पीय जोखिमको क्षेत्रमा पर्छ। यस अवसरमा आज विभिन्न जनचेतनामूलक कार्यक्रम आयोजना गर्न लागिएको जनाइएको छ। (रासस)
