मिलन राई
इलाम-२०८३ जेठ ३०, इलामको इलाम नगरपालिका वडा नं. १० गोदक काइलाटार र वडा नं. ८ तिल्केनी खण्ड जोड्ने झोलुङ्गे पुल निर्माणकार्य सम्पन्न हुने चरणमा पुगेको छ ।
केही वर्ष अघि नै रेडबुकमा रहेको योजना त्यसै थन्किएर बसेको अवस्थामा इनपा वडा नं. १० का वडाध्यक्षको पहल र चासोका कारण सो पुल निर्माणकार्य अघि बढेको हो ।
वडाध्यक्ष ओमनाथ प्रधानका अनुसार २०८२ चैतमा निर्माणकार्य शुरुआत भएको र यही असार पन्ध्र अघि नै सम्पन्न हुने निश्चित भएको छ।
कोशी प्रदेश सरकारले स्रोत सुनिश्चित गरेपछि संघीय सरकारको ७५ लाख रुपैयाँ लगानीमा माइखोलामा निर्माण भइरहेको उक्त पुलको लम्बाइ १८० मिटर रहेको जानकारी दिदै असारको दोस्रो साताभित्रै निर्माण सम्पन्न भई सुचारु हुने र पैदल यात्रीका लागि निकै सहज हुने वडाध्यक्ष प्रधानले बताए ।
