जितेश मण्डल
असार ५ / काठमाण्डौ: उपत्यकामा कोरोना महामारी रोकथाम तथा न्यूनीकरणको लागि लगाइएको निशेधाज्ञा जारी छ । यस अघि उपत्यकामा थप गरिएको निषेधाज्ञा असार ७ गते रतिको १२ बजेसम्म मात्र रहनेछ ।
यसैबीच उपत्यकाका तीन वटै जिल्ला (काठमाण्डौ, ललितपुर, भक्तपुर) का प्रमुख जिल्ला अधिकारीहरू पुन: एक साता देखि १० दिनसम्म निषेधाज्ञा थप गर्ने तयारीमा जुटेका छन् ।
उपत्यकाको संक्रमणदर हेरेर निषेधाज्ञाको मोडालिटी फेरबदल गर्दै आएको र एकैपटक निषेधाज्ञा हटायो भने पुन: कोरोना महामारी नियन्त्रण बाहिर जाने भएकोले सजग रहने र निषेधाज्ञा पुन: एक साता देखि १० दिनसम्म थप्ने तयारी गरिएको काठमाण्डौंका प्रमुख जिल्ला अधिकारी कालिका प्रसाद पराजुलीले बताउनु भएकोछ ।
निषेधाज्ञा तत्कालै नहटाउने र चरणबद्ध तरिकाले खुकुलो बनाउँदै लैजाने रहेको प्रजिअ पराजुलीले बताए । निषेधाज्ञा कडाई गर्ने भन्दापनि संक्रमण नफैलिने गरी व्यवस्थापन गर्नतिर लागिरहेको उनले बताए । त्यसोत, कोभिड-१९ संकट व्यवस्थापन केन्द्र (सिसीएमसी)ले असार ७ गतेपछि निषेधाज्ञाको स्वरूप परिवर्तन गरेर निषेधाज्ञा थप गर्ने निर्णय गरिसकेको छ ।
गत बुधबार सिसीएमसीको बैठकले निजी तथा सार्वजनिक सवारी साधन समेत चलन दिने गरी निषेधाज्ञाको स्वरूप परिवर्तन गर्ने निर्णय गरेको थियो, यस विषयमा समेत प्रशासनका अधिकारीहरूले छलफल गरिरहेको बताइएको छ ।
