गोरखा । बुढीगण्डकी नदीमा आएको बाढीले जगत लघुजलविद्युत आयोजनामा क्षति पुगेको छ । चुमनुब्री गाउँपालिका – ३ को सल्लेरी, जगत र भालुबनका ७३ घरधुरीले प्रयोग गर्दै आएको लघुजलविद्युत बाढीका कारण बन्द भएको हो ।
३८ किलोवाट क्षमताको उक्त लघुजलविद्युत आयोजनामा शुक्रवार बाढिले क्षति पुगेको र टर्वाइनले काम गर्न छाडेको स्थानीय विरवल घलेले बताए । विद्युत उत्पादन ठप्प भएपछि बाढीले बिस्थापित सल्लेरीका स्थानीय त्रिपालमुनि अन्धकारमा बस्न बाध्य छन् ।
बालवालिका, सुत्केरी र वृद्धवृद्धालाई बिजुली नहुँदा झनै समस्या भएको उनले बताए । उक्त जगत लघुजलविद्युत आयोजना एकदशक अघि काधुरी नामक एकसंस्थाले निर्माण गरेको थियो ।
मर्मत गर्न अझै केही दिन लाग्ने र विद्युतको विकल्पनमा सोलार, मैनबत्ती केहीपनि नभएकाले मर्मत नहुँदा सम्म स्थानीय अन्धकारमा बस्न बाध्य छन् ।
