काठमाडौं । काठमाडौं उपत्यकाका काठमाडौं, ललितपुर र भक्तपुर जिल्ला प्रशासन कार्यालयहरुले यसअघि स्थगित गरिएका सबै सेवाहरु आजबाट सञ्चालनमा ल्याएका छन् । जनस्वास्थ्य सम्बन्धी मापदण्ड पालना गरी मंगलबारबाट उपत्यकाका जिल्ला प्रशासन कार्यालयहरुले आंशिक रुपमा सेवा पुनः सन्चालनमा ल्याएका हुन् ।
कोरोना संक्रमणको महामारी बढेपछि यसअघि जिल्ला प्रशासन कार्यालयहरुले अत्यावश्यक बाहेक नागरिकता वितरण, प्रतिलिपी बनाउने, नाबालक परिचयपत्र, पासपोर्ट सिफारिस, संघ÷संस्था दर्ता लगायतका सबै सेवा स्थगित गरेका थिए । जनस्वास्थ्यका मापदण्डको पूर्ण पालना गरी सेवाग्राही उपस्थित हुन सक्न जिल्ला प्रशासन कार्यालयले जनाएको छ ।
आजबाट नयाँ नागरिकता, नागरिकताको प्रतिलिपी, नाबालक परिचयपत्र, राहदानी वितरण तथा सिफारिस सेवा सुरु भएको छ । हातहतियार दर्ता तथा नवीकरण, संघसंस्था दर्ता तथा नवीकरण, पत्रपत्रिका दर्ता र अन्य सिफारिसहरु पनि खुला भएका छन् । उता जिल्ला प्रशासन कार्यालय भक्तपुर र ललितपुरले जिल्लाका सबै सरकारी एवं सार्वजनिक निकायलाई मंगलबारदेखि नियमित सेवा प्रवाहको व्यवस्था मिलाउन अनुरोध गरेको छ ।
कोरोना महामारी फैलिएपछि रोकथामका लागि सरकारको नीति अनुसार जिल्ला प्रशासन कार्यालयहरुले बैशाखको दोस्रो साताबाट शुरु गरिएको निषेधाज्ञा थप खुकुलो बनाउँदै लगेका छन् ।
हाल काठमाडौं उपत्यकासहित ७५ जिल्लामा निषेधाज्ञा जारी छ । उपत्यकामा यही असार १४ गते राति १२ बजेसम्मका लागि खुकुलो ढाँचाको निषेधाज्ञा जारी रहनेछ ।
