काठमाडौ । प्रधानमन्त्री केपी शर्मा ओलीले सोमबार बोलाएको मन्त्रिपरिषद्को बैठकले अकस्मात नेपाल प्रहरीमा एक एआइजीको दरबन्दी थप गर्यो ।
महानिरीक्षकका लागि एक्ला दाबेदार का रुपमा सबैले हेरेका विश्वराज पोखरेलसँग एक दरबन्दी थपेर सरकारले दुई जनालाई प्रतिस्पर्धा गराउन खोजेको चर्चा भएको छ । योसँगै संगठनभित्र हल्लीखल्ली मच्चिएको छ ।
योसँगै भावी महानिरीक्षकको खेल पनि उल्टिने सम्भावना बढेको छ । जसका प्रबल दाबेदार सहकुल थापा भएको गृह मन्त्रालय स्रोत बताउँछ । उनी आफ्नो ब्याचमा पहिलो नम्बरका डिआइजी हुन् । अन्य डिआइजीलाई प्रदेशमा पठाइएपनि सोही कारण उनलाई हेडक्वार्टरमै राखिएको छ ।
यद्यपी धिरजप्रताप सिंह, उत्तमराज सुवेदी लगायत पनि एआइजी बढुवाको प्रतिस्पर्धामा हुनेछन् । केही दिनमै एआइजी बढुवा सिफारिस समितिको बैठक बस्दैछ ।
सरकारले कार्य तथा अपराध अनुसन्धान विभागलाई छुट्टाछुट्टै विभाग बनाएर एआइजीको दरबन्दी थप गरेको हो ।
हालका प्रहरी महानिरीक्षक शैलेश थापा क्षेत्रीले आगामी बैशाखमा अवकाश पाउनेछन् ।
